മാനന്തവാടി: കടുത്ത യാത്രാദുരിതത്തിൽ വലയുന്ന വയനാട് ജില്ലയ്ക്ക് ആശ്വാസമേകാൻ പൂഴിത്തോട്-പടിഞ്ഞാറത്തറ, തലപ്പുഴ-അമ്പായത്തോട് ബദൽ പാതകൾ അടിയന്തരമായി യാഥാർത്ഥ്യമാക്കണമെന്ന് കെ.സി.വൈ.എം. മാനന്തവാടി രൂപത അർദ്ധവാർഷിക സെനറ്റ് സമ്മേളനം പ്രമേയത്തിലൂടെ സർക്കാരിനോട് ആവശ്യപ്പെട്ടു. സംസ്ഥാന സിൻഡിക്കേറ്റ് അംഗം വിമൽ കൊച്ചുപുരയ്ക്കൽ ആണ് സമ്മേളനത്തിൽ ഈ സുപ്രധാന പ്രമേയം അവതരിപ്പിച്ചത്.
കെ.സി.വൈ.എം. മാനന്തവാടി രൂപതയുടെ 32ാമത് അർദ്ധവാർഷിക സെനറ്റ് സമ്മേളനം ദ്വാരക കോ-ഓപ്പറേറ്റ് ഓഡിറ്റോറിയത്തിൽ പ്രൗഢഗംഭീരമായി നടന്നു. സമ്മേളനം കെ.സി.വൈ.എം. മുൻ രൂപത ഡയറക്ടറും കോ-ഓപ്പറേറ്റ് അസോസിയേറ്റ് മാനേജരുമായ ഫാ. റോബിൻ പടിഞ്ഞാറേൽ ഔദ്യോഗികമായി ഉദ്ഘാടനം ചെയ്തു.
കെ.സി.വൈ.എം. മാനന്തവാടി രൂപത പ്രസിഡന്റ് ശ്രീ. നിഖിൽ ചൂടിയാങ്കൽ സമ്മേളനത്തിൽ അധ്യക്ഷത വഹിച്ചു. രൂപത ഡയറക്ടർ ഫാ. സാന്റോ അമ്പലത്തറ ആമുഖപ്രഭാഷണം നടത്തി.
ലഹരിക്കെതിരെയുള്ള ബോധവൽക്കരണത്തിന്റെ ഭാഗമായി സംഘടിപ്പിച്ച റെഡ് റിബൺ ആൻ്റി ഡ്രഗ് ക്യാമ്പയിൻ, പരിസ്ഥിതി സംരക്ഷണാർത്ഥം നടത്തിയ ഗ്രീൻ ഫ്യൂച്ചർ പരിസ്ഥിതി വാരാചരണം എന്നിവയിൽ രൂപതയിൽ ഏറ്റവും മികച്ച പ്രവർത്തനം കാഴ്ചവെച്ച യൂണിറ്റുകളെയും മേഖലകളെയും സമ്മേളനത്തിൽ വെച്ച് ആദരിക്കുകയും അവർക്കുള്ള ഉപഹാരങ്ങൾ വിതരണം ചെയ്യുകയും ചെയ്തു.
സമ്മേളനത്തിൽ രൂപത ജനറൽ സെക്രട്ടറി റോബിൻ ബിജു വടക്കേക്കര സ്വാഗതവും, സെക്രട്ടറി ദിവ്യ പാട്ടശ്ശേരിയിൽ നന്ദിയും രേഖപ്പെടുത്തി. സംസ്ഥാന സെനറ്റ്, സിൻഡിക്കേറ്റ് അംഗങ്ങൾ, രൂപത സമിതി അംഗങ്ങൾ, മേഖല ഭാരവാഹികൾ എന്നിവർ സമ്മേളനത്തിൽ സന്നിഹിതരായിരുന്നു. രൂപതയിലെ വരുംകാല പ്രവർത്തനങ്ങളെക്കുറിച്ചുള്ള കൃത്യമായ ആസൂത്രണത്തോടെയാണ് സെനറ്റ് സമ്മേളനം സമാപിച്ചത്.
വയനാടിന്റെ യാത്രാദുരിതം: ബദൽ പാതകൾ അടിയന്തരമായി നടപ്പിലാക്കണം; കെ.സി.വൈ.എം. രൂപത സെനറ്റ് സമ്മേളനത്തിൽ പ്രമേയം
By admin
